11
-Ta Ɩabɩn -nɩa Asɔɔ 'ɔ 'blʋa jei 'wɔan Sosue' 'a tʋ 'a "jru kpa nynɩ 'sʋ ɛ, ɔ dboɛ -tadboʋn 'de Ɩobabʋ -nɩa Madɔn 'ɔ 'blʋa jei o, 'blʋa jeʋn -nɩa 'de Simʋlɔnɩ ke Akɩsafʋ o, 2 ɛ ke 'blʋa jeʋn -tia" 'de crʋɩ 'dii 'de 'kwea fɔo o, 'de Alaba 'a wlao 'di 'de Kinerɛtɩ -sɔɩn fɔo, 'de wlao -nɩa 'de 'tɔniɛ wɔɩn ke crʋɩ "kpo -nɛ 'de Dɔɔ 'ɔ 'jrʋ 'a blʋ 'ɩn. 3 Ɔ kpa wlʋ 'de Kanaa nyʋ -nɩa 'de 'jrʋ 'a wlʋ 'ɩn ke ɛɛ' i blʋ 'ɩn ke, 'de Amɔɔ -nyʋ wo, 'de Ɛtɩ -nyʋ wo, 'de Felesi nyʋ wo, ɛ ke Sebusɩ -nyʋ -tia" crʋɩ 'dii wo, ɛ ke Ɛfi nyʋ ʋʋ -tia" 'de Ɛrmɔ crʋ wɔ 'de Misɩpa blʋa 'di fɔo wo. 4 'Blʋa jeʋn -nɩa 'mʋa- -wee' "klein ke ka ʋʋa' tʋ -fʋn nyʋ -wee' -tia a muɛ tʋ "i. Ʋʋpʋ -tiɛi" ɛ je sʋn i -si' ka -pɩɩɔn" -nɩa 'de 'tɔniɛ wɔin -tia a, ʋʋpʋ 'bleɛ soo"- -tuu" ɛ ke tʋ -fʋn -wocro' ke. 5 'Blʋa jeʋn -wee' poɛ wlʋ "i -wɛ ʋʋ 'dba -cri 'de Merɔmʋ 'a -ni -pʋn" 'de ʋʋ 'je Israɛ -nyʋ tʋ o -fʋn'. 6 Nyɔsoa wluɛ Sosue' -pee ɛ 'na: Ʋʋa' faʋn 'de -ʋn -nʋɛ', dɛ-nʋɛ' mɛ nɩ -bo ti a sea ka nɩ -klae" ɛ, ʋʋ -wee a muɛ 'mɩa, 'ma muɛ ʋʋpʋ sʋn "kpei -saa' ɩn 'je -ʋn ʋʋpʋ Israɛ -nyʋ "nyɩ; -ma muɛ ʋʋpʋ 'a soo"- 'a bʋ 'de taʋn'- cɛan' -wɛe -ɩn -je ʋʋa' tʋ -fʋn -wocro' "jri po.7 Nyʋ -nʋ se Sosue' ke ɔɔ' tʋ -fʋn -nyʋ -wee' "klein -kwli" -te' 'sʋ ʋʋ je ʋʋpʋ "kpei 'wla 'de "ni fla' -nɩa 'de Merɔmʋ -pʋn". 8 Nyɔsoa -sa ʋʋpʋ sʋ "kpei Israɛ -nyʋ 'a tʋ je ʋʋpʋ du -wɛe ʋʋ je ʋʋpʋ inʋ mamaʋ 'sʋ ʋʋ je Sidɔn "kwi -kwlɔ klaa" jɛɛ-, mamaʋ 'sʋ ʋʋ je Micrefɔtɩ Maimʋ -kwlɔ jɛɛ- -wɛ ʋʋ je Misɩpe 'a -toʋn" jɛɛ- 'de 'jrʋ 'a 'wlʋʋ 'ɩn fɔo. Ʋʋ tʋ du ʋʋpʋ 'mɛ ka -cɔɔn' ka ɛ nʋɛ' 'sʋ ʋʋa' nyɔjrɔ' se 'kmʋ sie-. 9 Sosue' nʋɛ ʋʋpʋ ka Nyɔsoa "sia ɛɛ' 'nynɩ 'de ɔ -pee ɛ: Ɔ cɛn ʋʋa' soo"- 'a bʋ 'de taʋn "i -wɛe ɔ po ʋʋa' tʋ -fʋn -wocro' "jri.
10 'De ɛɛ' nɔ" tu 'di ɛ, -ta ʋʋ nɩa de jia' a, Sosue' kpʋn Asɔɔ -nɩa 'blʋa jeʋn -wee' 'a 'blʋa ʋʋ -tea "jrukpɔ i 'a "kwi -kwlɔ klaa". Sosue' 'dbaa ʋʋa' 'blʋa jei -placnɛ "i 11 -wɛe ɔ 'dbaa dɛ "klein -nɩa 'kmʋ -placnɛ nma" "i ɔ se 'e dɛjrɛ' sie ɛ se 'kmʋ nɩ- ɔ "nyɩ Nyɔsoa 'sʋ ɔ poɛ Asɔɔ -kwlɔ "jri. 12 Sosue' 'a kpʋn 'blʋa jeʋn -poa' wlu -tadue -wee' 'a "kwi -kwlɔ -ke. Ɔ kpʋn ʋʋa' 'blʋa jeʋn -wee' 'mɛ -wɛe ɔ dba' ʋʋpʋ, ɔ 'dbaa ʋʋpʋ -wee' -placnɛ "i ɔ "nyɩ Nyɔsoa ka Moisɩ Nyɔsoa 'a dbo nʋɩ "sia ɛɛ' 'nynɩ 'de ɔ -pee ɛ. 13 'Kaa Israɛ -nyʋ se "kwi -kwlɔ -nɩa 'de crʋɩ "kpo "kpei i "jri po -bo ɛ se Asɔɔ Sosue' poa "jri nɩɛ. 14 Dɩ Israɛ -nyʋ -sa tʋ 'ʋn ʋʋ kpa mɩ -nɩ "wlii ke "nɔdɩ -nɩa 'de "kwi -kwlɔ -nɩ 'dii, 'kaa ʋʋ 'dba nyɩɔ -nɩ 'dii -wee' -placnɛ "i ʋʋ se nyɔjrɔ' 'e sie. 15 Ka Nyɔsoa "sia ɛɛ' 'nynɩ 'de ɛɛ' dbo nʋɩ Moisɩ -pee 'kamɔ Sosue' nʋɩ -wee' "kpɩ ɔ se ɩa' dɛjrɛ' -saa.
16 'Kamɔ ɛ nʋ 'sʋ Sosue' kpʋn 'blʋa -nɩ -wee': 'Blʋa 'a 'fɔ -nɩa 'de crʋ 'di, Nekɛfʋ -wee', Kosɛnɩ -blʋa, wlao -nɩa 'tɔniɛ wɔin, Alaba 'a -toʋn" 'dii, ɛ ke 'blʋa 'a 'fɔ -nɩa Israɛ 'ɛ crʋɩ 'dii ɛ ke wlao -nɩa 'de 'kwea fɔo. 17 'Blʋa jeʋn -nɩa 'de Alakɩ -crʋ -nɩa 'de Sei' -pʋn" de -sɔɩn -ɛ mua -ɛ -jɛɛ Baalɩ Gadɩ 'de Diban "bie klaa" -pʋn", 'de Ɛrmɔ crʋ -pʋn" 'de 'kwea fɔo ɔ kpʋn -wee' "klein 'mɛ -wɛe ɔ 'dba ʋʋpʋ. 18 Tʋ Sosue' ke 'blʋa jeʋn -nʋ -fʋan' nʋɛ -sʋn -tuu" -tuu. 19 "Kwi -kwlɔ deejrɛ' ke Israɛ -nyʋ se 'flɛ 'ʋn -te -tɩ -tu" -bo ɛ se Gabaɔn Ɛfi nyʋ "tia 'di nɩɛ; -jɩ -sia 'emu ɔ kpʋn -wee' "klein 'mɛ tʋ 'ʋn. 20 Dɛ -nɩa 'mʋa- 'wlʋɛ 'de Nyɔsoa 'ʋn, dɛ-nʋɛ' ɛ kmuu ɛ ʋʋpʋ 'a pɛe "i 'de ʋʋ 'je Israɛ tʋ o -fʋn', -wɛe ʋʋ se ʋʋpʋ 'a wɛe jei ʋʋ 'je ʋʋa' ma" i -sa mamaʋ 'sʋ ʋʋ 'je Nyɔsoa "nyɩ ka Nyɔsoa 'tmʋɛ 'de Moisɩ -pee ɛ
21 'De ɛɛ' nɔ" tu 'di -ke ɛ, Sosue' muɛ Anakɩ -nyʋ -tia" 'de Eblɔn 'ɔ crʋ 'di, Debii, Anabʋ, 'de Suida 'a crʋɩ 'dii ke Israɛ 'a crʋɩ 'dii 'a ma" i saa. Ɔ -sa ʋʋpʋ 'a ma" i -wɛe ɔ wa ʋʋa' "kwi -kwlɔ -wee' ɔ "nyɩ Nyɔsoa 22 Anakɩ -nyʋ jrʋ' se 'de Israɛ -nyʋ 'a -blʋa "kpei sie -bo ɛ se "kwi -kwlɔ nyʋ a 'daa Kasa o, Gaatɩ ke Asɩdɔdɩ nɩɛ. 23 Sosue' 'a tʋ du 'blʋa -nɩ -wee' "klein 'mɛ ka Nyɔsoa 'tmʋɛ 'de Moisɩ -pee ɛ, -wɛe ɔ -sea' 'blʋa -nɛ 'ʋn 'de Israɛ -nyʋ 'a 'blʋa 'a 'blowɔn 'nynɩ -bo ɛ nɩ 'kan 'de jrɔ' 'je ɔɔ' -nɩ 'fɔ -jea ɔɔ' 'kɛn nɩ kpa. 'Sʋ tʋ -cra' 'de 'blʋa -nɛ 'di.